നൃത്തശാലയിൽ

____________________________

സങ്കടങ്ങൾ വാരിയുടുത്ത
പെൺകുട്ടീ,
ചുണ്ടിൽ 
വേനൽ ചുവന്ന്,
മിഴികളിൽ
സമുദ്രം നിറച്ച്
നിൻ ചടുല നർത്തനം.

___________________________

മാറ്റം

________________________ 

ഒരു കാടു 

നിറയെ 
ഭ്രാന്ത് പൂക്കുമ്പോഴാണ്
ഞാനൊരു 

കാമുകനാകുന്നത് /

പകുത്തു പോകുന്ന 
പെണ്ണുമ്മകളിൽ
പ്രേമം നനയുന്നേരമാണ്
ഞാനൊരു
വേനൽ 

മരമാകുന്നത്..

____________________ (മാറ്റം )

Haiku Poems/ ഹൈക്കു കവിതകൾ-3

____________________________________________

പുഴ പെയ്യുന്നു 

മഴ ഒഴുകുന്നു 

നാം നനയുന്നു 

_____________________________________________

ഏകാന്തത-

ഓർമകളിലേക്കൊരു 

കുറുക്കു വഴി 

___________________________________________

മരിച്ചു പോകയാൽ 

ആരുമെന്നെ 

വിളിക്കാതെയായി 

____________________________________________________

മൂവന്തി ചുവപ്പ് 

നിള പകുക്കുന്നതും നോക്കി 

ഒരൊറ്റ പറവ.

___________________________________________________

മകരക്കുളിർ 

മാന്തളിർ തുമ്പിലും 

മാമ്പഴ ഗന്ധം 

_____________________________________________

എത്ര ക്ഷണികം 

പ്രണയ വേഷങ്ങളിലീ 

മൂഡസ്വർഗ്ഗം. 

____________________________________________________

പൊഴിഞ്ഞൊരില 

പോയ പൂക്കാലങ്ങളുടെ 

ഉന്മാദ ഗന്ധം 

______________________________________________________ 

പാൽമണം 

പിഞ്ചിളം സ്വരം-

അമ്മ തൊട്ടിൽ.

_______________________________________________________ 

ജീവിത വേദി.

വീണ്  തലയുടഞ്ഞോർ 

ഹ; വേഷ ഗാംഭീര്യം !

_____________________________________________________________ 

ആകാശ കുട 

ജീവിതം നനഞ്ഞൊരേ 

പ്രാണ  വേഷങ്ങൾ 

____________________________________________________________ 

ചുവപ്പ് പൂക്കുന്ന വേനലിൽ.

_______________________________ 

ശരിക്കും 

ഒരുച്ച ചൂടിലാകാമത്-

ആകാശം തുളച്ച് 

ഇലപ്പടര്പ്പു കരിച്ച് 

ചുവപ്പ് 

മണ്ണിലേക്ക് നൂഴ്ന്നിറങ്ങുന്നത്.

അതെ-

കണ്ടില്ലെന്നു പറയരുത്, 

മൌനം 

നടിക്കരുത് ,

മീനച്ചൂടിലൊരു 

ഗംഭീര നാദം,

തൊണ്ട കീറിയൊരു 

ഉഷ്ണക്കാറ്റ് 

പോടി വിതറി 

പൂത്തത്.

തെരുവിലൊരു പെണ്ണിൻ 

വിയർപ്പിൽ ചുഴിഞ്ഞ് 

ചുവപ്പ് ചേല ഉയര്ന്നത്.

ഓര്മയിലൊരു 

ജപ്തി നോട്ടിസിൻ 

ഏപ്രിൽ ചിരിയിൽ 

ചുവപ്പ് നാടകൾ 

പുലഭ്യം പറഞ്ഞത്.

****** ********* ******** ********

വേനലിൻ സീൽക്കാരമേ,

അലറുന്ന ഉഷ്ണച്ചൂടേ 

കൊക്കിലൊരു നോവുമായീ 

മുറിവ് പകുക്കുക.

ഒരു നിമിഷം-

നട്ടുച്ച മൂർച്ഛയുടെ 

ഒറ്റ നിമിഷം 

പ്രാണന്റെയീ 

കൊടും ചൂടിനെ 

കൊത്തിയെടുക്കുക.

വേഷങ്ങളുടെ 

ഋതു വേഗങ്ങളെ 

വേനൽ കിനാവുകളിൽ 

പകരുക ; ലഹരിയുടെ 

തളികയിൽ 

പ്രണയം നിരത്തുക.

ആത്മ വീര്യം നുരയും 

സിരകളിൽ 

വസന്തം നിറക്കുക

****** ********* ******** ********

ചുവപ്പ് പൂക്കുമീ 

വേനൽ വീണ്ടും 

വസന്തമാകുമയാണ് -

തൊണ്ട നീറുമീ ആദി ദാഹത്തിലേക്ക്,

ഓർമ്മകൾ മൂടുമീ ചെമ്മണ്ണില്ലേക്ക്,

നീര് വറ്റിയ 

ഹൃദയങ്ങളിലേക്ക്,

വറുതിയിലേക്ക്,

സ്നേഹ ശൂന്യതയിലേക്ക്,

പ്രണയത്തിലേക്ക്,

അന്യതബോധങ്ങളിലേക്ക്,

നിരാസങ്ങളിലേക്ക്,

ഓഫീസിലേക്ക്,

മദ്യശാലയിലേക്ക്,

വേശ്യാലയങ്ങളിലേക്ക്,

തെരുവിലേക്ക്,

ആദി വിശപ്പിന്റെ 

കൊടും മൌനത്തിലേക്ക്‌,

വർത്തമാനങ്ങളുടെ 

പാഴ് കാഴ്ചകളിലേക്ക്.

****** ********* ******** ********

ഒന്നുറങ്ങുംന്നേരം 

കെട്ട കാലത്തേക്ക് 

ചുഴറ്റിയെറിയുന്ന 

ഉച്ചക്കാറ്റേ ,

ചുടു വിയർപ്പേ 

പ്രാണ നിശ്വാസമേ 

വേനലിന്റെ വസന്തമായി 

നീ ചോര തുപ്പിയല്ലോ 

വരണ്ട മണ്ണിലേക്കീ 

വേനൽ പൂക്കൾ.

________________________________

(Image Courtesy- Art by Gireeshkumar)

ഒറ്റ മുറിയിലൊരേ നേരം.

________________________________ 

പകൽ

 മയങ്ങിയൊരു 

മുറി 

സന്ധ്യയിൽ 

വീണു 

തലയുടഞ്ഞു 

ചുവന്നു 

പോയ 

നാം 

നീ ജാലകമടക്കുന്നു 

നിഴലുകളുടെ 

കുപ്പി 

തുറന്ന്/  

തണുപ്പിന്റെ 

ചഷകം 

നിറക്കുന്നു.

രതിയോളം നുര 

പതയുന്ന

ഞാൻ..

ഒറ്റ വാക്കിന്റെ

 വ്യഗ്രതയിൽ 

വിഷം തീണ്ടുമീ 

ആലിംഗനം.

കൊടുംകാറ്റൊരു 

ചുംബനം_-

 അനാദി വര്ഷമൊരു 

തേടൽ / 

ഒരേ നനവിൽ 

പെയ്തു 

തോരാതെ 

നാം.

യാമങ്ങൾ 

നമ്മിൽ 

ചിറകറ്റ നിദ്ര .

ഒരു മരണ 

മൂർച്ഛയുടെ 

പിടയലിൽ 

പുലരി കൂവുന്നു.

ഇരുളിന്റെ 

കുഴിമാടം തുറന്നു 

രണ്ടു 

പരിശുദ്ധരെ പോല്രെ

 നാം 

ആവർത്തനങ്ങളിലേക്ക് 

എഴുന്നേൽക്കുന്നു. 

നാം 

എഴുന്നേൽക്കുന്നു.

___________________________________ 

(Art courtesy  to T.Rut )

 .

Haiku Poems / ഹൈക്കു കവിതകള്‍ -2

കുഞ്ഞുടുപ്പില്‍ മഴ നനച്ച് ജൂണ്‍.

____________________________________________________

ചുരമിറങ്ങി കരിമ്പനയിലേക്കൊരു തമിഴ് കാറ്റ്.

_______________________________________

മധു ചഷകം നോവു നുരയുമൊരു കുഴി മാടം.

__________________________________________

നിളാ ദുഖം പ്രണയം വറ്റിയൊരു വൃദ്ധ കന്യക.

________________________________________

സ്വപ്നങ്ങൾ മണ്ണിട്ട കുഴിമാടം രാത്രി.

__________________________________________

വെയിൽ നനഞ്ഞൊരു മഴ ഒഴുകുന്നു.

_________________________________________

രാപ്പകലിൽ അരുമയാം കുഞ്ഞ്- സന്ധ്യ.

_________________________________________

തീരവും തിരയും;
ക്ഷണികമാം
അഭയം . 

________________________________________________

ഒരു ചുംബനത്താൽ 

നീ മൊഴിയുന്ന ഭാഷ 

അതെതാണ് പെണ്ണേ

__________________________________________

മറവിയുടെ താഴ്വരയിൽ ഒറ്റപ്പെട്ടൊരു മരം- കാത്തിരിപ്പ്.

__________________________________________________

മൌന മുനയേറ്റു മുറിഞ്ഞ് വിശുദ്ധ പ്രണയം.

__________________________________________________

മഴയല്ലിവള്‍;

മരണം വിതക്കുമീ ദുര്‍ ദേവത.

________________________________________________

മൃതി ശൈത്യം പ്രാണൻ കൊഴിഞ്ഞ ശതാവരി പൂവ്.

______________________________________________

പകൽ വളർന്നൊരു
ഋതുമതി പെണ്ണ്-
സന്ധ്യ. 

________________________________________________

മരണത്തിലന്ത്യം,
പ്രണയത്തിലാദ്യം 
ചുംബനം-
ജൈവ ബന്ധനം.

_______________________________________________

സഞ്ചാരി

________________________________

നിരാസങ്ങളുടെ
വൻകരകളിൽ നിന്നും
നിഷ്ക്കരുണം
എടുത്തെറിയപ്പെട്ട
എന്റെ കപ്പൽച്ചേദമേ/
നോവിന്റെ 
ഉപ്പു കാറ്റേ/
പ്രണയ ശൂന്യതയുടെ
വിളക്കുമരമേ /
സ്നേഹരാഹിത്യത്തിന്റെ
കപ്പൽ ചാലുകളിൽ
വഴി പിഴച്ചു/
ദിക്കുകൾ തെറ്റി /
കടലാഴം നോക്കി/
ഭൂപടം നഷ്ട്ടപ്പെട്ട
നിൻറെയീ
നാവികൻ .

______________________________________